Mizoram SACS – Laboratory Service Division service pek chhuahte

Laboratory Service Division, Mizoram SACS-in a thawh leh a tum bulpui ber chu, HIV test dan leh a final result an pek chhuah (HIV negative emaw HIV positive emaw )- a kha, dik, rintlak, tha, kalhmang fel tak nei leh chhuizui ngai a nih pawha chhui zui leh vek theiha siam hi a ni.

Lab Service Division hnuaia hna kan kalpuite a indawt danin in lo tarlang ila:

1. ICTC (Integrated Counselling and Testing Centre – HIV test na hmun) leh Blood Bank ah:

HIV test thin laboratory-te chuan khaidiat anga in-endik kualin, result rintlak tak a pe chhuak thin a ni. A inkhaidiat dan chu a hnuaia tarlan ang hi a ni.

Apex Laboratory, National AIDS Research Institute (NARI), Pune

↓

National Reference Laboratory (NRL), NICED, Kolkatta

↓

State Reference Laboratory (SRL) Department of Microbiology, Civil Hospital Aizawl

↓

Integrated Counselling and Testing Centres (ICTC) leh Blood Bank, Mizoram

Hetianga HIV kan test-na result dik leh rintlak a nih theih nan hian, NACO (National AIDS Control Organization) scheme duan sa hman a ni a; chu chu External Quality Assessment Scheme (EQAS) tih a ni. Mizoram chhungah ICTC 41 leh Blood bank 10-te chu hemi scheme hnuaiah hian endik vek an ni. A endik dan kalphung hi hlawm thuma then a ni a, tawitein lo tarlang ila:

1. RECHECKING or RETESTING (Tihnawn emaw Ennawn lehna): ICTC 41-te chuan January, April, July leh October thla an chuan kai phat atanga chhuta, ni 7 chhunga HIV an test tur sample an lak khawm zat atangin 20% HIV positive leh 5% HIV negative-te chu SRL, Department of Microbiology, Civil Hospital Aizawl-ah an thawn khawm thin a ni. SRL-te hian lo test nawnsak leh vekin, a dik leh dik loh an lo endik nawn leh vek a, hei hi ICTC tinte result pek chhuah chu false negative result emaw, false positive result emaw lo pe chhuak palh tur veng tura duan a ni.

• PROFICIENCY TESTING (A rintlak zia tehna): NRL, NICED Kolkatta chuan “Coded sample” or “Unknown sample” (positive sample nge negative sample a nih hriat loh) chu SRL, Department of Microbiology, Civil Hospital Aizawlah May leh October thlaah an rawn thawn thin a ni. He an sample rawn thawn hi SRL leh ICTC 41 leh Blood Bank 10-te endik nan an rawn thawn a, SRL-te chuan ICTC leh Blood Bank-ah a lo pe chhuak chhawng leh thin a ni. Hei hian a testing device a tha em tih leh, a test-tu laboratory technician kha a hriatna leh thiamna a zau tawk in, test dan tur dik hmangin test result dik tak a hmuchhuak em tih a endik a ni.

• ONSITE EVALUATION (A hmun a endikna): Technical Officer, SRL, Department of Microbiology, Civil Hospital, Aizawl chuan ICTC tinte tlawhin a endik bakah, an harsatnate a sutkianpui thin a ni.

• CD4 (Thisen var chi khat) EQAS: Hei hi ART Centre CD4 test-na khawl (CD4 testing machine) neite endikna atan-a duan a ni a, May leh October-ah Coded or Unknown sample count (CD4 count awm zat hriat loh sample) tur chu, NARI, Pune atangin direct-in ARTC-ah an rawn thawn thin a ni. Hei hian CD4 test-na khawlin CD4 count result a pek chhuaha kha a dik hrulah a awm leh awm loh a endik a ni. Mizoram chhungah ARTC 6-te chu CD4 EQAS programme hnuaiah hian endik an ni a, chung centre-te chu, Aizawl ART Plus Centre, Kulikawn ARTC, Kolasib ARTC, Lunglei ARTC, Champhai ARTC leh Mamit ARTC te an ni.

• NABL (National Accreditation Board for testing and Calibration Laboratories):

NABL ISO 15189:2021 dung zuiin SRL tan bika apply tur a ruat a ni. Mizoram bikah chuan SRL 1 chiah neiin SRL, Department of Microbiology, Civil Hospital, Aizawl chuan November 2016 khan HIV leh CD4 testing area-ah NABL Accredited Laboratory dinhmunah an inhlangkai tawh a ni. Amaherawhchu, he certificate hi kum hnih chhung chauh a nun avangin, kum hnih danah apply that zel a ni. Hei hian SRL, Department of Microbiology hnuaia HIV leh CD4 test result-te chu khawvel pum huap pawh in a rintlak in pawm ani tih a entir a ni.

• QMS (Quality Manangement System): Hei hi ICTC 32-te tan bik chauha duan a ni a, Mobile ICTC 9-te chu a huam tel ve lo a ni. He QMS hi ISO 9000: 2007 zul zuia duan a ni a; ICTC-HIV testing laboratory-te hnuaia a tir atanga a tawp thlenga quality service an pek chhuah theihna atana endikna siam a ni. Hei hian testing ngawr ngawr chauh huam loin hlawm lian pui pui pathumah then a ni. Chungte chu: Pre-examination (HIV testing tih hmaa tih ngai zawng zawngte), Examination (HIV testing tih laia ngai zawng zawngte) and post Examination (HIV test tawh hnua tih ngai zawng zawng)-te endik vek a ni. ICTC zawng zawngte hi he QMS behchhana endik vek tawh an ni tawh a, ICTC 17-te chuan Grade 5 hmuin “QMS-ICTC Certificate of Excellence” anhlan tawh a ni.

• NABL-MELT Program (Medical Entry Level Testing Laboratory): Hei hi, he program-a QMS-ICTC Certificate of Excellence hmu tawhte tana apply tura ruahman a ni a. He program-in a tum ber chu testing quality tha neih a ni. An certificate pek chhuah hi kum thum chhung a nung a, he certificate nei tur hian ICTC Certificate of excellence hmu a piang te tan a hma lak zel tum ani.

• VIRAL LOAD TESTING: Viral load chu HIV hrik kan thisena a tam lam emaw/a tam dan emaw tihna a ni. Kan thisena HIV hrik a tam chuan, kan CD4 count a tlahniam chak a, HIV hrik vanga natna lang chhuak thinte a lo lang chhuak hma ta thin a ni. HIV hrik paite tan a ni a, a hrik tam lam en thin a ni. HIV positive ART damdawi ei te’n, an damdawi ei lai an ngeih em? A hlawhtling em? Damdawi dangin thlaksak an ngai dawn em? tiha kha an viral load test result atangin a enkawltu doctor-in a lo enfiah thei thin a ni.

Chumi piah lamah, HIV hrik paite’n an kawppui emaw mi dang HIV hrik la kai ve lote mipat hmeichhiatna atanga an kai chhawn theihna chance kha nasa takin a titlahniam a, hei hian HIV hrik sex atanga inkaichhawn leh darh zau zel tur a veng a ni.

 Viral load count test result-a natna hrik hmuh tham awm tawh lo te phei chu sex atanga kawppui emaw mi danga an kaichhawn theihna chance kha 0% a ni e tih a ni hial a ni (Undetectable = Untransmittable). Hei hi viral suppression tih a ni.

VIRAL SUPRESSION CHU ENGE AWMZIA? HIV hrik paiin HIV/ART damdawi a ei that chuan, thla ruk emaw, a aia tlemah emaw pawh, a viral load count hi a tlahniamin, a hrik paite inthlah pung thei lo a siamin, a thisenah a hrik hmuh tur awm tawh lo khawpin a damdawi ei khan hna a thawk a, hei hi Viral suppression an ti a ni.

(Amaherawhchu, HIV hrik kha taksaah a awm tawh lo tihna ni loin, khawi lai taksa pengah emaw hmuh theih lohin an biru ta thin a, ART damdawi ei that loh chuan HIV hrik a kha rawn lanchhuah leh inpeih rengin an tawm bo tihna a ni)

HIV positive hmuh chhuah tharte’n, ART damdawi thla ruk tal tha tak a an ei tlin tawh chuan test theih vek a ni.

HIV hrik paite tana Viral load test-na khawl hi Mizoramin kan la neih loh avangin, NACO chuan PPP (Public Private Partnership) mode-in Mizoram tan a ruahmanna min siamsak angin test hi kalpui a ni a; heng ART damdawi lam theihna kan neih centre parukte i.e Aizawl, Kulikawn, Kolasib, Lunglei, Mamit leh Champhaiah te thisen laktir theih a ni. ART din thar tur Serchhip, Saiha leh Lawngtlaiah hian zauh belh tura hma lak mek a ni bawk.

Hemi piah lamah Aizawl district chhunga TI-NGO 13 hnuaia HRG register client – HIV positive thla ruk ei tling tawhte tan, a hmunah thisen laktir theih a ni bawk.

Thisen sample center tin a lakte chu Lengpui Airport atangin Guwahati-ah, Guwahati atangin Metropolis Laboratory, Mumbaiah thlawhnain ni tin thawn thlak thin a ni.

VIRAL LOAD TEST CHUNGCHANGA HRIAT TURTE:

1. ART damdawi tha taka thla ruk ei hnuah Viral Load test tur a ni. Heta result azir hian test dan tur a awm leh a, chungte chu:

• Viral load count result a lo chhuaha TND (Target Not Detected) emaw Viral load count 1000/mL aia tlem a nih a, 1^st Line ART damdawi ei lai a nih bawk chuan, a test atanga kum khat hnuah test leh tur a ni.

• Viral load count result a lo chhuah a, a viral load count 1000/mL ai a tam chuan ART damdawi tha tak a thla thum chhung ei lehin, thla thum hnuah a test nawn leh tur a ni.

• Viral load count result a lo chhuaha TND (Target Not Detected) emaw Viral load count 1000/mL aia tlem a nih pawhin, 2^nd & 3^rd Line ART damdawi ei lai a nih bawk chuan, a test atanga thla ruk dan apiangin a test leh tur a ni.