MSACS leh School Education Department te’n MoU Ziak

Mizoram State AIDS Control Society (MSACS) leh School Education Department, Mizoram chuan high school leh higher secondary zirlai ten an zirlai kara hriselna leh nunphung dik zir tel theihna tur thawhdunna tur inremna thuthlung ni 15 December, 2023 khan an ziak.

Pawl 8,9 leh 11 ten an zirlai bakah hriselna leh nunphung dik an zir tel theihna tura National AIDS Control Organization (NACO) in a ruahman Adolescence Education Programme (AEP) chu Mizoramah hun engemaw chen kalpui a lo ni tawh thin a, tunah tharthawh leh turin School Education Department Secretary Dr. Lalzirmawia Chhangte leh Dr. Lalthlengliani, Project Director, MSACS te chuan thawhdunna tur inremna thuthlungah hian hming an ziak a ni.

AEP-ah hian sawrkar laipui Ministry of Health & Family Welfare leh Ministry of Human Resources & Development ten Ayushman Bharat hnuaia School Health Program an ruahman zulzuia kalpui tura ruahmanin National Health Mission (NHM) leh SCERT nen thawkho tura ruahman a ni. NHM hian sawrkar zirna school lama hma an lak mek avangin tun tuma thawhhona turah hi chuan private high school leh Higher Secondary School bik puala kalpui tura inremna ziah a ni.