BLOOD TRANSFUSION SERVICE (BTS) KALPHUNG
Blood Transfusion service (BTS) hi mite nun chhan nana health care delivery system zinga bung pawimawh tak a ni a. Mipuiten thisen thianghlim engtiklai pawha an dawn theih nan sorkarin nasa takin hma a la a, Blood Bank te pawh tih changtlun zel niin hmanraw thar leh changkang zawk hmangin a kalpui zel a, a thawktute pawh kumtin training pek an ni thin. Thisen hi Blood Bank atang pek chhuah hmain thisen atanga natna inkaichhawn theih hrang hrang HIV, Hepatitis B & C, Syphilis leh Malaria te test vek a ni a, thisen thianghlim chauh mipuiin an dawn theih nan fimkhur takin a kalpui a ni.
Tun dinhmunah chuan Mizoram Blood Bank 11 kan nei mek a, chungte chu;
- Model Blood Bank, Civil Hospital Aizawl
- Blood Bank, Civil Hospital Lunglei
- Blood Bank, District Hospital Champhai
- Blood Bank, District Hospital Siaha
- Blood Bank, District Hospital Lawngtlai
- Blood Bank, District Hospital Kolasib
- Blood Bank, District Hospital Serchhip
- Blood Bank, District Hospital Mamit
- Blood Bank, Zoram Medical College, Falkawn
- Blood Bank, Synod Hospital Durtlang
- Blood Bank, Christian Hospital Serkawn
India ram puma thisen pek kawnga khairual tak kalpui a nih theih nan National Blood Transfusion Council (NBTC) chuan hma a la a, State tina lo bawhzui turin State Blood Transfusion Council (SBTC) din a ni bawk a. NBTC chuan April 2022 khan National Blood policy a duang chhuak a, chungte chu :
National Blood policy
No – 1 : Thisen thianghlim tha, mipui mamawh tawk pe thei tura hmalak tur a ni.
No – 2 : Ram pum tan Blood Transfusion Service kalpui that a nih theih nan a tul ang hmanrua ngaihtuah sak.
No – 3 : Thiamna thar hmang tangkai zel chungin Blood Transfusion Service tih a ni ang.
No – 4 : Mipuite zirtirna, thisen thianghlim hlutna leh pek reng tulna a zau thei ang bera kalpui.
No – 5 : Mamawhtu dik tak hnenah chauh thisen pek tul zia zirtir a ni ang.
No – 6 : Thawktu indaih zawk, thiamna tha zawka thuam zel tura hmalak.
No – 7 : Thisen inpek dan tha zawk leh changkang zawk zawng chhuak zel tura kalpui.
No – 8 : Dan felfai taka thisen inpek chu kalpui niin, kalpui ngei a nih leh nih loh ennawn fo a ni ang.
Blood Bank hian khawi atangin nge thisen a hmuh thin?
Blood Bank hian thisen hmuhna (source) pathum a nei:
- Professional Donation : Thisen hralh leh lei. Hei hi Supreme court chuan a khap bur tawh a ni.
- Replacement Donation (Tu emaw tan bika petu te) : Tu emaw damlo thisen pek ngai an awm avang kan in koh khawm chawp a, kan pek thin hi. Mizote hi kan tlawmngai em em a, thisen pek a tul pawhin YMA te kan tlanchhe ngai lo. Kan in ko khawm a, zanlaiahte kan mu lai pawh kan in kai tho thin. A ropuiin tihzel tur pawh a ni. Mahse tunlaiah HIV, Hepatitis B & C, VD hrik, Malaria hrik te test phawt zel a ngaih tawh avangin in zawn buai chhung nen hun kan khawhral nasa lutuk thin a. Damlote’n a hun takah thisen an dawng thei lo fo. Blood Bank ah thisen dahkhawl tur a awm thei lo bawk.
- Voluntary Donation : Tu tan bik ti chuang lova, a ,mamawh apiang hman atan, kan remchan huna kan pek mai thin e.g. Blood donation Camp ah te, Birthday leh ni pawimawh bika kan pek ve hrim hrim ang chi hi. Hetianga thisen pek hi a ropuiin khawvel ram zawng zawngin thisen pek dan tura duhthusama an neih chu a ni ta a ni.
Voluntary a pek kher hi eng nge a tulna?
- Blood Bank ah thisen test sa diam, emergency-a hman mai tur a khawl khawm theih phah.
- Thisen pek saktu tur nei ve lote tan an hmang thin
- Damlo chhungte tan thisen petute lakah senso a ngai ve lo.
- Zanlaiah te inkoh khawm chuk chuk a ngai lo.
- Hetianga pe an tam chuan thisen petu tur in buai a ngai lo.
Voluntary a thisen pe kan tam tak tak hunah chuan damlo chhungte’n thisen an zawn buai a ngai tawh lovang a, rulh ngai lovin Blood Bank atangin kan la chhuak zung zung mai ang.
Voluntary donation that bikna te
- Voluntary chu mahni duhthu liau liau tihluihna tel lo
- A mamawh apiang tana hman theih
- An thisen dawngtu tur an hre lo
- Thisen dawngtute’n a petu an hre lo.
- Voluntary Donors dik tak chuan vawi hnihkhat mai ni lovin vawi tam tak an pe thin.
Replacement donation a tawk lo
- Replacement donation ah chuan miin thisen a pek kha mi pakhat tan chauh a ni thin
- Emergency a hman turin Thisen Stock a awm thei lo.
- Thingtlang mi leh damlo chhung leh khat nei lo tan Relacement donor tur hmuh a harsa
- Donor in zawn chhung leh Thisen test chhungin hun tam tak khawhral a nih thin avangin damlo tan nghah chhuah hman loh a hlauhawm thei.